A pantalla do club
Como pór o marcador en calquera TV, introducir resultados desde o móbil e saír do paso cando algo falla. Todo o que hai aquí son cousas que pasan de verdade o día do torneo.
Antes de comezar
Cinco minutos pola mañá aforran media hora coa xente agardando.
- Unha TV con navegador. Calquera smart TV dos últimos anos ten un.
- A TV e o ordenador NON teñen que estar na mesma wifi: os dous falan co ClubScore por internet, non entre eles.
- Proba a wifi onde vaia estar de verdade a TV, non no despacho.
- Deixa clubscore.live/tv nos favoritos da TV. Agradecerasllo á próxima.
- Comproba a hora do ordenador: se vai atrasada, o ClubScore pode liarse ao gardar.
A pantalla fixa do club
Para a tele de sempre: a do bar, a da recepción.
- 1En Club, abre «A pantalla do club» e preme «Faime o enderezo».
- 2Na tele, abre o navegador e escribe o enderezo. Ou preme «Enviar a unha TV» e faino co código, sen teclear.
- 3Listo. A partir de agora, escolle en Club que sae. A tele cambia soa.
Pór o torneo na TV
É o camiño bo: a TV vai por internet e vese con toda a calidade. Sen cables.
- 1Na TV, abre o navegador e vai a clubscore.live/tv. Aparecerá un código de catro letras ben grande.
- 2Desde o ordenador, a tableta ou o móbil, abre o teu torneo e preme «Enviar a unha TV».
- 3Escribe o código e preme «Enviar». A TV salta soa: alí non tes que tocar máis nada.
O código caduca: se a TV leva media hora amosándoo e ninguén o usou, xera un novo. Se o escribiches e non pasa nada, mira se o da TV cambiou.
Se a TV come as marxes
É o problema máis común e non é culpa túa nin do ClubScore.
Moitas TV —sobre todo as LG— amplían un pouco a imaxe e amosan só o centro. Chámase overscan, vén da televisión analóxica, e moitos navegadores de TV non che deixan apagalo. Notarasllo porque falta a columna da dereita ou a fila de abaixo.
- 1No cadro de «Enviar a unha TV» hai un regulador de marxe con − e +. Envíao con «Vese todo» e mira como queda.
- 2Se falta a dereita ou o pé, preme + dúas ou tres veces.
- 3Preme «Reenviar á última TV» e mira outra vez. Repite ata que vexas as marxes.
Lémbrase para a próxima: unha vez acertado o da túa TV, non o volverás tocar.
Se a TV non ten navegador
Plan B: cable HDMI do ordenador. Funciona sempre, pero vese peor.
O que lle tes que pedir ao ordenador ten nome, e sabelo aforra media hora buscando.
- Pantalla estendida — a TV é unha segunda pantalla independente. O marcador vai alí e o panel quédache no ordenador. É o que queres.
- Duplicar — a TV amosa unha copia exacta do ordenador. Funciona, pero tes que ir saltando entre marcador e panel, e o público ve todo o que fas.
No Mac: Configuración do Sistema → Pantallas → preme a TV → «Usar como» → Pantalla estendida. Pantalla completa con ⌃⌘F. En Windows: tecla ⊞ + P → Estender, e despois F11.
Introducir resultados desde o móbil
A pé de pista, e o marcador da TV refréscase só.
- 1No móbil, entra en clubscore.live coa conta do club.
- 2Preme «Modo móbil» — o botón co debuxo dun teléfono. Está na lista de torneos e dentro do torneo. Se entras por Club, vai antes ao panel do deporte («Cada deporte, o seu panel») ou preme «Día de partido» na tarxeta do torneo.
- 3Escolle torneo e categoría: botóns grandes de + e − pensados para o dedo.
Por que o modo móbil e non o panel normal: o modo móbil está a escoitar a nube en directo e traballa sempre coa última versión, aínda que outra persoa estea a meter resultados no ordenador. O panel grande non o fai, e se o deixas aberto pode quedar atrás.
Cantos aparellos á vez? Os que queiras: non hai límite. A única regra é de sentido común: repartide os partidos, porque se dúas persoas tocan o mesmo partido no mesmo segundo, vale o último toque.
Cando a wifi vai feble
As pistas de fóra son o punto negro de case todos os clubs.
O ClubScore aguanta ben os cortes curtos: o que escribes no móbil non se perde, queda gardado no aparello e sobe cando volve a cobertura. O que pasa é que a TV queda co resultado anterior ata que sobe.
- Se ves que a TV vai atrasada, mira a cobertura do móbil antes de tocar máis nada. Adoita ser iso.
- Se tes que traballar un anaco sen cobertura, apunta os resultados en papel e métenos todos xuntos cando volva a wifi.
- Se repartides QR aos xogadores, proba antes a wifi das pistas. Se alí non chega, os xogadores non poderán, e quen queda mal é o club.
Se sae un aviso amarelo
«A pantalla non se actualizou.»
Quere dicir que na nube hai cambios máis novos ca os deste navegador: normalmente porque alguén meteu un resultado noutro aparello, ou un club convidado gardou a súa parte. Non perdiches nada — o que tes na pantalla está todo. É só que o ClubScore non quere pisar o traballo do outro.
- Desde o móbil: adoita resolverse só. Sae do modo móbil e volve entrar.
- Desde o ordenador: importa a copia da nube e continúa desde alí.
- Se non marcha: comproba a hora do ordenador. Unha máquina atrasada provoca exactamente este aviso, unha vez tras outra.
Os cinco problemas de verdade
Os que pasan de verdade, e que facer.
| Pasa | Fai |
|---|---|
| Falta a dereita ou o pé | Sobe a marxe con + e preme «Reenviar á última TV». Repite ata que caiba |
| A TV non cambia nunca | Mira en «A pantalla do club» que tes escollido. Se a tele di «Este enderezo xa non se usa», pon o novo. |
| A TV vai atrasada | Cobertura do móbil. Volve cando haxa wifi |
| Aviso amarelo que non marcha | A hora do ordenador; despois importa da nube |
| O código non funciona | Recarga clubscore.live/tv: xerará un novo |
Queres probalo no teu club? O plan gratuíto dá para un torneo enteiro, e velo na TV tamén entra.
Entrar en ClubScore